BOTAN-DER û ARÎ-DERî de qeydê kursanê ziwanî dest pêkerd
Komeleya ziwanê Kurdkî ya ARÎ-DER’î ya Êlihî û Komela BOTAN-DER’î ya Sêrtî de qeydê kursanê lehçeya kurmancî ya Kurdkî dest pêkerd.
Komela Cigêrayîşanê Ziwan û Kulturî ya Arî (ARÎ-DER) ya Êlihî ke serra 2018î de ameya akerdiş û ê demî ra nat bêmaben dersanê lehçeya kurmancî biserûber dana, qeydê kursanê lehçeya kurmancî dest pêkerd. Kursî do 3 aşmî dewam bikerê. Dersê ke do bi kurdkîya kurmancî bêrê dayîş, daraxê destpêke ra hetanî daraxo hîrêyin ê. Kesê ke wazenê kurmancî bimusê, hetê raştnuştiş û gramerî ra kurmancîya xo aver berê, eşkenê muracatê nê kursan bikerê. Dersî do hem rî bi rî û hem zî onlîne bêrê dayîş.
Sêrt
Komela Kultur û Hunerî ya Ziwanê Kurdkî ya Botanî (BOTAN-DER) ya Sêrtî ke serra 2022î de ameya akerdiş bêmaben kar û xebatanê xo ê tîyatro, muzîk û dersanê lehçeya kurmancî ya Kurdkî domnena. BOTAN-DERî zî qeydanê kultur, huner û lehçeya kurmancî dayê dest pêkerdiş û qeyd kerdiş do hetanî hewtêyek bidomê. Kursan de do daraxanê destpêk, yewin û diyîn de dersî bêrê dayîş. BOTAN-DERî de dersanê ziwanî ra teber, do dersê keman, gîtar, tembur, erbane, def û bilûrê zî bêrê dayîş.
