Komxebata Sînemaya Kurdan: Zehmetîyê ke sînemaya kurdan ciwîyena yenê nîqaşkerdene

Sînemakarî, seba ke problem û ameyoxîyê sînemaya kurdan nîqaş bikerê, Salona Konferansî ya Şaredarîya Şaristanê Neweyî ya Amedî de ameyî têhet. Komxebata Sînemaya Kurdan a ke Akademîya Sînemaya Rojhelatê Mîyanênî wayîrîya keyeyî ci rê kena, şaristananê Tirkîya û Kurdîstanî ra xeylêk sînemakarî, kaykerî, nuştoxî û derhênerî tewrê ci bîyî. Komxebata ke bi rûmetgirewtiş dest pêkerd, sînemakarê ke weşîya xo vîndî kerda Xelîl Dax, Hacî Lokman Bîrlîk, Sirri Sureyya Onder, Taha Kerîmî, Mehmet Aksoy, Mensur (Pîro) Kerîmyan, Mazdek Ararat, Hakan Tezel û Kadîr Înanir nêameyî vîrakerdene.

Aram Dildaro ke qiseykerdişê akerdişî kerd, bale ante ci ser ke sînemaya kurdan zehmetîyê pîlî vîyarnayî. Dildarî vîr fîst ke seba averşîyayîşê sînemaya kurdan xeylêk awanîyê sazîyî virazîyayî û xeylêk sînemakarî resayî û wina vat: “Ma nê wextî ra dima do nîqaş bikerê ke gelo ma bi ziwanê xo yê dayîke sînema kenê yan nê. Sey sînemakarên kurdan gelo ma eşkenê şêrê yew awanbîyayîşê sazîyî?’ ma do naye nîqaş bikerê.”

Dildarî vîr vîst ke Tirkîya de bi serran ziwanê kurdkî qedexe bi û bale ante ci ser ke têkoşînê ziwanê dayîke de bedelê pîlî ameyî dayene. Dildarî da zanayene ke ê sey Akademîya Sînemaya Rojhelatê Mîyanênî nê xebate rê wayîrîya keyeyî kenê labelê nê wextî ra dima ê hedef kenê ke na xebate bi rêxistinbîyayîşê kolektîfê hemparî yê ke komxebate ra bivejîyo, bêro rayraberdene. 

Dildarî îfade kerd û vat: “Eke problemê sînemaya kurdan est ê, no problemê ma pêroyînan o. Ma eşkenê çareserîya ci zî pîya aver berê. Bi na xebate seba averşîyayîşê sînemaya kurdan gereka ma senîn yew rêxistinbîyayîşî awan bikerê, formul û çareserîyanê ci ma do pîya bi yew aqilê kolektîfî bivejê werte.”

Komxebata ke qiseykerdişê akerdişî ra dima çapemenîye rê girewte dewam kena de, zehmetîyê ke sînemaya kurdan vîyarnena û pêşnîyazê çareserîye do bêrê nîqaşkerdene.