Amed de Konferansê Huqûqnasan: Vengdayîşê yewbîyayîş û statuyî
Amed de bi pêşengîya Komeleya Huqûqnasanê seba Azadîye (OHD) "Konferansê Huqûqnasanê Kurdan ê Demokratîkan" dest pêkerd. Konferans de ke do di rojan dewam bikero; seba çareserîya meseleya kurdan, garantîkerdişê heqanê kolektîfan û awankerdişê yewbîyayîşê neteweyî mesajê muhîmî ameyî dayene.
Konferanso ke bi diruşmeya “Seba Azadî, Statu û Aştîya Huqûqê Demokratîkî” Şaredarîya Amedî de ame kerdene, bi tewrbîyayîşê serekê baroyanê Vakurê Kurdîstanî, rayberê sazgehanê huqûqî û xeylê avûkatan dest pêkerd. Konferans do 2 rojan bi 5 roniştiş û 2 foruman dewam bikero û peynîye de yew netîcename bêro eşkerakerdene.
Hemserekanê OHD’yî (Serhat Çakmak û Ekîn Yeter) û serekê baroyan bale ante ser ke kurdî teberê sîstemê huqûqî de ameyê veradayene. Ame dîyarkerdene ke ganî huqûqnasê kurdan bibê yew û no konferans seba Kongreya Yewbîyayîşê Neteweyî bibo bingeyêk.
Serekê Baroyê Amedî Abdulkadîr Guleç û serekên bînî dîyar kerd ke meseleya kurdan eynî wext de meseleya ziwan û kulturî ya. Meseleyêka kolektîfe tena bi naskerdişêko kolektîf çareser bena; coka heqê ziwan û statuyê şarê Kurdî ganî bi destûrêko bingeyîn ê neweyî bêrê garantîkerdene.
Temsîlkaranê sazgehan dîyar kerd ke aştîye tena bi bêvengkerdişê çekan nêbena. Seba çareserîya rasteqîne, mûzakerekerdişê bi Rayberê Şarê Kurdî Abdullah Ocalanî muhîm o û afernayîşê komarêka demokratîke hewce keno.
Abdulal Ocalanî selamê xo erşawit
Endamê Buroya Huqûqî ya Asrinî Faîk Ozgur Erolî da zanayene ke Rayberê Şarê Kurdî Abdullah Ocalanî pêvînayîşê 24ê Gulane de selamê xo erşawitê konferansî û dîyar kerd ke polîtîkaya tecrîdî zerar dana prosesê çareserîye. Hemserekê DAD-SAZ’î Sîpan Gokanî mizgînîye daye ke mabênê di aşman de "Ferhengê Termanê Huqûqî" yê Kurdkî (Kirmanckî/Kurmancî) do bêro çapkerdene.
