KCK: O do her tim têkoşînê ma yê azadîye û zerrîya şarê ma de weş bo
KCK’yî kadroyanê ronayoxanê PKK’yî ra Fuat (Alî Haydar Kaytan) serrgêra 8. ya şehadetê ey de bi hurmet vîr ard û vat: "Embaz Fuat do tim têkoşînê ma yê azadîye û zerrîya şarê ma de biciwîyo. Têkoşînê ey do bibo têkoşînê ma."
Hemserekîya Konseya Rayberîya ya KCK’yî vat: "Serrgêra 8. ya şehadetê embaz Fuatî (Alî Haydar Kaytan) ya. Ma ronayoxanê koma Apoyîyan û embazê 50 serran ê Rayber Apoyî embaz Fuatî bi hurmet û minet vîr anê; seba caardîşê hesretanê ey ma sozê xo reyna newe kenê."
Eşkerayîya KCKyî de wina ame vatene:
"Embaz Fuat qandê destpêkerdişê şerê gerîlayî, serra 1983yî de vejîya koyanê ke tarîx de şarê kurdî pawito. Koyanê ke ey zaf hes kerdêne de 3yê Temmuza 2018î de şehîd bi. O kombîyayîşê Awbendê Çubukî ra heta peynîye bi teqîbkerdoxêko bi israr yê xeta Rayber Apoyî. Seba ke kesayetê Raybertîye û şoreşgêrîya pîyle bido famkerdene, xebatêka bêhempa kerde. Coka Rayber Apoyî seba ey vatbî, 'embazo ke mi, mi ra rindêr fam keno û dano famkerdene'. Embaz Fuat zey domanê keyeyêko ke rî bi rîyê qirkerdişê Dêrsimî yê 1937-38î mendo, pê eşnawitişê nê zulmî pîl bi. Hêrsê ey yê vera zulmî o kerd welatperwer û şoreşgêrêko pîl. O zî şaîr bi û şîîranê xo de hesbîyayîşê Kurdîstanî û hêrsê zulmî bi hîsanê xurtan ardî ziwan.
Embaz Fuatî perwerdeyê kadroyanê ma û şarê kurdî de rolêko zaf girîng kay kerd. Bi hezaran pelî nirxandinê ey estê ke raştîya Raybertîye, PKK’yî, azadîya cinîyan û cimatê Dêrsimî îfade kenê. Nê nuşte û ercnayîşî do ra dima zî perwerdeyê şarê ma de bibê rayber. Seba ke merdim raştîya Dêrsimî û qirkerdişî fam bikero, ganî embaz Fuatî fam bikero. Ma do tim vengîya ey hîs bikerê û na vengîye bi berzkerdişê têkoşînî pirr bikerê. Hesretê ey do bibê hesretê ma, têkoşînê ey do bibo têkoşînê ma."
