Îran de hepsê sîyasîyî dest bi grevê vêşanîye kerd
Hepsê sîyasîyî yê Zindanê Merkezî yê Savehî, vera bêedaletîya mehkemeyan, binpaykerdişê heqanê bingeyênan û cezayanê giranan, dest bi grevê vêşanîye kerd.
Eyaletê Sevhenî yê Îranî de, hepsê sîyasîyî yê ke çalakîyanê aşma çeleyî de ameyî tepiştene, vera cezayanê giranan, îşkence û binpaykerdişê heqê muhakemekerdeyîşê adilî, Zindanê Merkezî yê Savehî de bi pîya dest bi grevê vêşanîye kerd. Dezgehanê heqanê merdiman raporêk de da zanayene ke, eke şertê xirabî yê zindanî dewam bikerê û waştişê zindanîyan û keyeyanê înan nêrê caardene, felaketêkê merdimîye eşkeno biqewimîyo.
Îtîrafkarîye yena ferzkerdene
Goreyê raporanê dezgehanê heqanê merdiman, cezayê giranî yê Mehkemeyanê Şorişî spenê îtîrafanê ke binê îşkenceyî de bi zor ameyî kerdene. Mehkemeyan bê ke pawitişê zindanîyan bigêrê vîrî û derheqê îdîayanê îşkenceyî de cipersayîşêko xoser bikerê, cezayê giranî dayî. Rapor de no zî sey binpaykerdişê standartê muhakemekerdeyîşê adilî ame nirxnayene.
6 aşmî yo heqanê bingeyênan ra mahrum ê
Rapor de ame dîyarkerdene ke hepsê sîyasîyî nêzdîyê 6 aşmî yo Zindanê Savehî de yê. "Raporanê peyênan de ame vînayene ke şertê ciwîyayîşî xirab ê û zextê serê zindanîyan zêde bîyî. Heto bîn ra, hepsê sîyasîyî nê aşmanê peyênan de heqê dîyayîşê avûkatêkê xoserî û têkilîya bi keyeyan ra ameyî mahrûmkerdene."
Ciwîyayîşê zindanîyan tehlûke de yo
Rapor de nê îfadeyî ca girewtî: “Destpêkerdişê grevê vêşanîye yê pîyayî, derheqê weşîya zindanîyan de qisawetî zêde kerdî. Pawitoxê heqanê merdiman vanê ke binê nê şertanê xiraban de dewamkerdişê grevî eşkeno cuyeya zindanîyan bivisno tehlûke. Ma sey keyeyanê zindanîyan wazenê ke wa cezayê giranî bêrê vindarnayene, dewayî reyna bi hawayêko adil bêrê dîyene, zextî biqedîyê û heqê qanûnî yê nê zindanîyan bêrê naskerdene."
